霸地皮

如果你非常醒, 就會發現喺香港係可以霸地皮.

一般黎講, 如果你喺業主無同意情況下估用私人土地達12年, 業主就唔可以入稟收回土地; 政府就好d, 60年內都可以入稟收回.

其實呢個制度幾好: 如果你塊地比人用咗12年都唔知/唔做野, 明顯你唔係好緊你塊地, 不如比人啦. 橫掂你都無盡過你業主責任去管理土地.

相關法例: 時效條例

僭建

大家可能覺得落地玻璃好靚, 對做生意更係求生必須, 但係有幾多人知裝落地玻璃好有可能係僭建, 仲要係屋宇署視為優先處理嗰類?

改落地玻璃, 一定要拆牆. 拆外牆無入則, 就一定係 “違建工程”, 即係大家平時所講嘅僭建. 點解裝落地玻璃都係優先優先處理類別? 怕且無人敢包你塊玻璃夠硬淨, 唔會跌人落街卦. 單位使用人有危險, 已經要優先處理, 加上以前好多樓外牆都係受力, 你拆牆可能搞到冧樓, 更加優先處理啦.

咁又唔係話一定, 一定唔可以裝落地玻璃, 最大原則係: 批咗則就乜都得. 如果比唔起錢請認可人士(其實唔一定要建築師)同入則, 有d人就選擇走鋼線: 拆牆一定犯法, 但係如果屋宇署唔出命令, 咁又可能唔駛回復原狀, 即係可以啦. 點解僭建唔出命令? 選擇性執法嘛. 憑咩唔做? 就憑有權無責. 除非有正義之士申請司法覆核, 而法庭又裁定屋宇署唔可以話唔屬優先類別就可以睇完算數, 否則大家都有機會走位.